Ferrol, 13 de novembro de 2020
Fai un ano o goberno desta cidade votaba en contra da moción presentada por Ferrol en Común relativa á continuación da construción do aparcadoiro disuasorio de Canido. Malia non contar co seu apoio, a proposta saíu adiante e o goberno do PSOE rematou, xa fai algúns meses, este aparcadoiro, con algunhas modificacións sobre o proxecto inicial.
Por normal xeral, todos os gobernos de todas as cidades están desexando inaugurar as obras que realizan, consideramos dende Ferrol en Común, porque soen ser melloras para a cidadanía que en consecuencia aumentan a calidade de vida da veciñanza e amplían os servizos cos que conta a cidade. Pero o goberno de Ángel Mato debe ser a excepción á regra, pois neste ano e medio de mandato púxose o broche final a tres obras: a remodelación da Praza de Armas, que ata houbo que recoller sinaturas para a súa apertura; o Mercado de Caranza, que seguimos agardando a que os praceiros/as ocupen os seus postos; e o citado aparcadoiro no barrio de Canido, que continúa pechado sen existir ningunha razón de peso que o xustifique, por moito que o goberno local invente unha escusa diferente cada semana.
Somos conscientes de que xusto estes tres proxectos son froito do traballo do goberno anterior, e dende Ferrol en Común comezamos a pensar que ao mellor aí é onde reside o problema, pero entón nestes catro anos de goberno do PSOE o único que verá esta cidade serán vaias e pechamentos pois o aparcadoiro do CHUF, as beirarrúas de Pazos, a reurbanización das rúas Espartero, Carmen Curuxeiras e Basanta, a ampliación do vial do cemiterio de Serantes, rehabilitacións en Recimil… non verían nunca a luz por pertencer tamén ao mandado anterior.
Todos os proxectos citados responden a melloras para a cidadanía e iso é o que importa e o que calquera goberno ten que ter en conta, en vez de manter pechados espazos sen ningunha razón aparente. Mellorar a vida da xente, señor Mato, para iso está vostede aí.
Ferrol en Común xa demandou demasiadas veces a apertura inmediata do aparcadoiro de Canido, un espazo que albergará máis de 160 vehículos dando un servizo necesario a un barrio que está en crecemento e complementando un proceso de peonalización, que agardamos sexa cara onde avance esta cidade; pero non nos cansamos, agora o noso papel é defender os intereses da cidadanía dende a oposición e iso estamos a facer, polo que lle dicimos unha vez máis ao Señor Alcalde: abra o aparcadoiro de Canido de forma inmediata, non existe ningunha razón para mantelo pechado.
