Ferrol, 18 de novembro de 2020
Ferrol en Común acaba de coñecer por terceiros, xa que a comunicación e a transparencia por parte do goberno local é nula, a inminente apertura do Mercado de Caranza. Un mercado demandado dende fai máis de 30 anos e que o goberno de Ferrol en Común foi quen de acometer as obras de reforma necesarias para converter este mercado nun espazo digno, amable e accesible para a venta de produtos de calidade e de proximidade, fomentando así o comercio local.
Dende Ferrol en Común queremos recoñecer a intensa loita que levaron a cabo os placeiros e placeiras de Caranza para que este novo mercado fora unha realidade; e outra batalla que nunca deberon librar, a de conseguir ocupar os seus postos en dita praza de abastos xa rematada dende fai meses. Ante isto, temos que afearlle ao goberno de Ángel Mato a tardanza en tomar unha decisión que poderían ter tomado dende o primeiro día, e que non é máis que o que propuxo este grupo municipal e o que demandaban os placeiros e placeiras.
Parece que darlle voltas e voltas a cada cousa é a dinámica habitual deste goberno, pois polo que podemos observar o aparcadoiro de Canido esta seguindo a mesma dinámica: un Alcalde que vai contra o que demanda o barrio e o que propón a oposición, levando cada decisión a diluírse no tempo mentres a veciñanza desespérase. Non hai que buscar fórmulas máxicas, soamente hai que escoitar aos cidadáns e cidadás e tentar de dar resposta as súas necesidades para mellorar a súa calidade de vida.
Coa aparente apertura do Mercado de Caranza e o reparto dos postos, que supón o desenrolo da actividade nunhas condicións adecuadas, ponse fin a outro proxecto realizado por Ferrol en Común que responde a demandas de barrio. Celebramos xunto cos placeiros e placeiras o inicio, aínda que bastante tardío, desta nova etapa nun novo Mercado tan ansíado, que Ferrol en Común, Jorge Suárez e María Fernández Lemos converteron en realidade.
