Ferrol, 29 de setembro de 2021

Onte o Concelleiro Suso Basterrechea estivo presente na concentración que tivo lugar no IES Concepción Arenal onde se reclamaba a non desaparición da Educación Secundaria de Adultos (SEA), un símbolo do propio instituto e da ensinanza da nosa cidade.

Despois dun inicio de curso no que se soportan elevados ratios de alumnado por aula e non se cobren as baixas de profesorado, impedindo incluso o comezo do curso nalgunas asignaturas do IES Concepción Arenal, a Xunta de Galicia, volve a efectuar recortes educativos cancelando a Educación Secundaria de Adultos neste centro, coñecida coma “nocturno”, alegando falta de matrículas, motivo que non se sostén pois actualmente cóntase con 19 alumnos e alumnas matriculados nesta modalidade, superando así o número mínimo de 15 matrículas para que poida levarse a cabo a educación para adultos.

Dende FeC consideramos intolerable e inxustificada a decisión da Xunta de Galicia que comunica a cancelación da Educación para Adultos co curso xa iniciado e incumprindo a normativa da Consellería de Educación, supoñendo un grave perxuizo para as persoas xa matriculadas e un desprezo cara a educación pública da nosa cidade.

Así mesmo, cualificamos de indecente o comportamento do goberno local, amosando unha vez máis despreocupación cara os problemas da cidade e da veciñanza, nun novo xesto de apatía fronte todo o que non sexan grandes actos e roldas de prensa nas que se alabar a sí mesmos.

Dende FeC, apoiamos e amosamos a nosa solidariedade co centro IES Concepción Arenal e os duros recortes que está a sufrir por parte da Xunta de Galicia. Así mesmo, exiximos a recuperación da Educación Secundaria de Adultos, unha modalidade que leva máis de 50 anos levándose a cabo neste instituto e que sigue contando con numerosas matrículas de alumnos e alumnas que buscan unha mellora na súa educación, ao contrario do que parece buscar a Xunta de Galicia con continuos recortes educativos que desmantelan o sistema público.