Ferrol, 23 de maio de 2022
Esta mañá o voceiro do grupo municipal de Ferrol en Común, Jorge Suárez, mantivo unha xuntanza co comité de empresa do CAMF para coñecer de primeira man os problemas que está a padecer o centro a causa da falta de persoal e do nefasto estado das instalacións.
Jorge Suárez lembraba que “o CAMF de Ferrol leva sobrevivindo a base de parches dende fai anos, sen embargo o que de verdade precisa é ampliar o seu persoal fixo, cubrir as prazas vacantes e dende logo renovar as instalacións que parecen doutros tempos”.
Na xuntanza desta mañá o Comité de Empresa trasladounos datos que consideramos francamente alarmantes, coma os máis de 1600 contratos temporais que se realizaron durante o 2021, que non fan máis que precarizar o emprego e o servizo, ademais de vulnerar o requerimento da Inspección de Traballo.
FeC comparte as demandas do Comité de Empresa e dos propios usuarios e usuarias do centro dependente do IMSERSO, que están a ver coma as actividades máis básicas da súa vida coma deitarse ou xantar están sendo limitadas pola falta de persoal. Un persoal que acumula horas extras e permisos que non pode coller porque se non o servizo quedaría sen cubrir. Dende FeC consideramos que a única solución é ampliar a RPT e adaptala ás necesidades do centro, xa que os 157 postos fixos, dos cales 23 están sen cubrir, non están a ser suficientes para dar un servizo digno e de calidade.
Dende FeC xa denunciamos varias veces esta situación inaceptable que agora se está a converter nunha situación límite na que é urxente poñerlle solución. Así mesmo, comprometémonos a levar o asunto ao Congreso dos Deputados para que sexa trasladado ao Ministerio correspondente e se lle busque unha solución efectiva que poña fin ao problema estrutural de persoal pero tamén ás deficiencias das instalacións as cales non se renovan dende fai máis de 30 anos e polo tanto non están adaptadas á accesibilidade precisa para o desenvolvemento autónomo das persoas con diversidade funcional, padecen avarías constantes e non gozan dunha eficiencia enerxética básica para dotar de confort aos usuarios e usuarias.
Para finalizar, apoiamos a proposta de moción que o propio Comité de Empresa do CAMF ten a intención de defender no vindeiro Pleno e presentámola para que teñan voz neste espazo municipal e as súas demandas sexan escoitadas.