Ferrol, 17 de novembro de 2022
Esta semana, o concelleiro Suso Basterrechea, visitou os locais de ensaio e denunciou a inminente finalización do contrato menor que se fixo fai un ano para reabrir estes espazos culturais que permanecían pechados dende a pandemia da Covid-19. Coma xa expuxemos, na actualidade atopámonos por un lado, cun contrato menor que remata, polo que de non facerse un novo de xeito urxente os locais de ensaio terían que pechar, e por outro, cun prego do servizo cuxa licitación non está prevista nin para este mandato. Estas dúas cuestións preocúpannos seriamente pois poñen de manifesto a falta de palabra do goberno local, a falta de xestión e a falta de compromiso coa cultura desta cidade.
Pero isto non remata aquí, xa daquela coñecíamos a intención do goberno local de derrubar a nave anexa ao mercado da Magdalena, unha cuestión que se atopa en moitas axendas políticas, incluída a nosa e coa que estamos de acordo. Sen embargo, esta obra de derrubo e a súa posterior creación dun espazo de lecer, obriga a reubicar aos locais de ensaio e aquí é onde o goberno local volver a fallar, pois apresurouse a anunciar o inminente derrubo da nave pero nin falou cos usuarios e usuarias dos locais de ensaio, nin ten prevista unha reubicación para eles e leas. Por isto, non podemos defender unha actuación que non é leal cun servizo municipal e unha actuación que se vai facer de costas aos máis de 100 músicos e músicas que ocupan este espazo cultural.
Hoxe saía na prensa a suposta preocupación do goberno local polos placeiros e placeiras e o seu aparente diálogo con eles e elas, algo que non está a suceder cos outros afectados polo derrubo da nave provisional, os asuarios/as do locais de ensaio. Dende Ferrol en Común consideramos que os músicos e músicas teñen o mesmo dereito a manter unha canle de comunicación co goberno local, pois coma é lóxico, atópanse preocupados por quedarse novamente sen os seus espazos de ensaio.
Dende Ferrol en Común tememos que o goberno local abandone aos locais de ensaio e deixeos morrer, silenciándoos. Primeiro non renovará o contrato menor para mantelos abertos e unha vez pechados, xa non buscará outros espazos onde reubicar estes locais fundamentais para o crecemento cultural da nosa cidade. Así será, coma o goberno de Angel Mato fulminará un servizo público.
En vista disto, dende Ferrol en Común, presentaremos una moción no pleno de novembro coa que exixiremos un compromiso real por parte do goberno local cos locais de ensaio e a súa reubicación, existindo múltiples opcións para elo coma o centro de PortaNova ou os baixos baleiros do Mercado de Caranza.