Ferrol, 23 de decembro de 2022
Esta mañá, Jorge Suárez, ofreceu unha rolda de prensa para anunciar a súa candidatura coma cabeza de lista de Ferrol en Común dentro do proceso de primarias que se está a levar a cabo na nosa organización e que rematará o vindeiro martes 27 de decembro coa votación e ratificación da mesma pola Asemblea de FeC.
Jorge Suárez é o único candidato que se presentou para liderar o noso espazo cara as eleccións municipais de maio de 2023. Arroupado por parte da organización, Suárez, agradeceu ás persoas que avalaron a súa candidatura e ao traballo realizado todo este tempo polas persoas da organización, “que manteñen FeC activo e vivo para que sega sendo a alternativa á esquerda do PSOE”. Así mesmo, lembrou a Fernando Miramontes, Vicente Couce e Conchita, coma referentes da loita obreira, grazas aos cales podemos gozar de moitos dos dereitos que temos hoxe, lembrándonos de onde vimos.
Suárez explicaba que da un paso adiante “con ilusión e ganas de ensanchar o espazo político a outras organizacións e facela o máis ampla posible, abrindo as nosas fronteiras políticas a toda a sociedade civil que queira construír canda nós un proxecto colectivo de esquerdas para Ferrol”.
“Agora toca un importante traballo de aquí a futuro”, indicaba Suárez, que consistirá en fortalecer un proxecto centrado no social e no humano, que mire máis cara a cidadanía e non ás grandes multinacionais, que ofreza solucións a problemas concretos e cotiás, que devolva a cultura a nosa cidade, blinde o benestar social, mire cara a xuventude, loite polos traballos dignos, free a crise demográfica, impulse a sostenibilidade e ofreza alternativas industriais.
En canto ao traballo orgánico “poñerémonos a negociar dende xa con outras forzas políticas que queiran acompañarnos neste proxecto e tamén estableceremos os grupos de traballo para que actualicen un programa que contempla un proxecto de cidade consolidado, pero que hay que adaptar á situación actual” explicaba o candidato de FeC, convidando a toda a sociedade, asociacións culturais, entidades sociais, ao tecido sindical, asociacións veciñais… “a participar na construción dende o cooperativismo dunha alternativa de cidade, coma espazo aberto e participativo que somos, fronte ao que nos poida ofrecer o vello e coñecido bipartidismo, que xa está algo caduco”.
“Se algo aprendimos nos últimos anos é que o ruído non conduce máis que a desencanto da sociedade, sobre todo á parte máis nova, afastando á cidadanía da política” reflexionaba Suárez, “polo que cremos que hai que construír deixando a un lado o ruído e ser conscientes de que a cidadanía agarda que se lle poñan solución aos seus problemas cotiás” e niso traballemos dende Ferrol en Común.
Parar rematar, o candidato fixo fincapé en que “son temos de sumar e de xuntar cantas máis voces mellor”, emprazando a todas as persoas que compartan a nosa visión a participar no noso espazo. “Temos gañas, temos ilusión e daremos a batalla ata o día das eleccións municipais tratando de ser unha alternativa cun proxecto colectivo de esquerdas que goberne esta cidade”, finalizaba Suárez.