Ferrol, 18 de xaneiro de 2022
No día de onte, vimos de rexistrar unha queixa ante rexistro para trasladar o noso malestar polo uso das redes sociais oficiais do Concello de Ferrol por parte do goberno municipal.
Entendemos que esa canle de comunicación é a oficial do Concello de Ferrol, é dicir, da Administración Pública local, que serve en moitos casos para publicitar o traballo do goberno local, por exemplo cando se anuncia unha futura obra, coma para informar á veciñanza dos diferentes eventos, coma pode ser o corte dunha rúa ou o horario da Cabalgata. Así mesmo, tamén se usa para informar dos actos institucionais aos que asiste toda a corporación, tanto goberno coma oposición, en representación da nosa cidade. Por este motivo, cando a intención é comunicar unha recepción, unha entrega de premios ou calquera acto nos que participa toda a corporación é unha absoluta falta de respecto omitir a presenza dos concelleiros e concelleiras da oposición, pois forman parte do Concello de Ferrol igual que o goberno local.
É habitual ver nas redes sociais do Concello coma as fotos de actos institucionais aparecen recortadas ou soamente se nomea aos membros do goberno como asistentes ao acto o que supón un uso partidista dunha canle de comunicación oficial da institución local.
Polo que, agardamos que a partir de agora se proceda a non realizar estas prácticas pouco elegantes coma mínimo en canto aos actos institucionais do Concello de Ferrol aos que asistimos, ademais do propio goberno, membros da oposición coma integrantes da corporación municipal e por tanto, representantes do Concello de Ferrol.