Ferrol, 21 de febreiro de 2022

Ferrol en Común rexistrou o pasado venres dúas moción no mesmo sentido, demandarlle ao goberno local o cumprimento do acordo orzamentario, en relación aos proxectos da Praza Vella e a Praza Rosalía de Castro. Este último ano vemos coma os proxectos propios do goberno local saen adiante mentres os acordados por ambas forzas quedaron en mero papel mollado. A inclusión da Praza Vella e da Praza Rosalía de Castro no acordo de orzamentos non foi un capricho de Ferrol en Común, se non que son unha demanda veciñal e unha necesidade para a nosa cidade.

O barrio de Ferrol Vello leva demasiados anos entre a despoboación e o abandono e é agora cando se lle está empezando a dar impulso. Logo de desenvolver diferentes proxectos, xa durante o noso mandato, coma as reurbanizacións de Manuel Comellas ou Carme Curuxeiras e os proxectos de Espartero e San Francisco que se atopa agora en execución, o seguinte paso sería rehabilitar integramente a Praza Vella, para convertela nun lugar de ocio e desfrute da veciñanza sendo a peza clave da rehabilitación do barrio.

Do mesmo xeito, a Praza Rosalía de Castro supón unha verdadeira necesidade dado o estado lamentable no que se atopa e que xa foi denunciado por activa e por pasiva, por veciñanza e por oposición, en multitude de ocasión. No acordo de orzamentos estaba consignada a cantidade de 50.000€ para o 2021 e 450.000€ para o 2022, cantidades que non foron executadas máis aló da elección por parte dos veciños e veciñas dun modelo de proxecto para a Praza.

Con estas dúas mocións queremos poñer de manifesto que existen outras obras necesarias para a cidade ao marxe dos 5 millóns de euros da rúa Igrexa ou o millón de euros para unha cafetería. Do mesmo xeito, asinar un acordo de orzamentos conleva unha seriedade e confianza que o goberno local non está a demostrar, faltando a súa palabra e xerando desconfianza, non só para nós se non tamén para a veciñanza, polo que ten agora a oportunidade de corrixir esta actitude e traballar para cumprir o acordo de orzamentos asinado.