Ferrol, 14 de marzo de 2023
Esta mañá estivemos no almacén loxístico que a empresa Lidl Supermercados ten no Polígono Río do Pozo en Narón e que distribúe non só as tendas de Ferrolterra, senón tamén a toda Galicia, Asturias e parte de Castilla e León, cunha plantilla de 150 traballadores e traballadoras, todas veciñas da comarca de Ferrolterra.
Practicamente o 100% do persoal atópanse en folga indefinida dende o 14 de febreiro por incumprimento do convenio, sobrecarga de traballo e realización de horas extraordinarias por riba das 80 horas extras anuais permitidas,polo que demandan máis persoal e mellores condicións laborais.
Tal e coma contáronos os traballadores/as está mañá, en todo este tempo a empresa non está aberta a negociación e nin se queira a escoitar as demandas dos traballadores/as, polo que é moi difícil acercar posturas e chegar a acordos sendo a única opción a folga. Sen embargo, o que si que está a facer a empresa, é boicotear o dereito a folga enviando a empregados/as doutros centros a realizar o traballo dos folguistas. Por isto, pola vulneración do dereito fundamental de folga, terá lugar un xuízo o vindeiro martes 21 de marzo.
Ferrol en Común quixo amosar o seu apoio a todos os traballadores e traballadoras do centro loxístico de LIDL e escoitar a problemática que os mantén en folga dende fai un mes. Por todo isto, presentaremos unha moción no vindeiro Pleno onde pediremos o apoio de toda a corporación e instaremos á Xunta de Galicia a exercer as súas competencias coma autoridade laboral.