O pobo é quen máis ordena
Ferrol, cidade de contrastes. Onde as clases non só se dividen entre xente sen as súas necesidades básicas cubertas, clases medias e meros especuladores de bens inmobiliarios, temos tamén cidadanía da zona rural e da urbana, con diferente prestación de servizos, xente concienciada e que ama Ferrol e xente que despreza cada recuncho da cidade polo que pasa.
Ferrol precisa medidas políticas concretas, artelladas entre todas, en emprego, en benestar social, en urbanismo, en cultura e deporte. Ferrol debe facer do pazo municipal o motor do cambio; a inxección necesaria de autoestima que nos faga rexurdir coma exemplo de perseverancia e loita.
O ciclo 2015 – 2019 foi para Ferrol en Común unha loita constante, unha singradura pola brava mar da marusía da política da baixa estofa, a que bombardea e desprestixia a honestidade das que entregan a súa vida durante catro anos por un proxecto colectivo que sitúe ás persoas no centro. Crecemento demográfico, creación de emprego, que ninguén quede atrás, unha cidade para as persoas, estes deben ser os nosos obxectivos fundamentais; rigor, honestidade e realismo o noso método de traballo; alegría, constancia e esquerdas as nosas armas. Queremos un Ferrol Rebelde no horizonte 2019 – 2023, queremos un lugar de todas.
Nós pulamos, coma sempre fixemos, polo diálogo, pola construción de abaixo a arriba, por antepor Ferrol aos intereses privados e ás forzas centrífugas que deciden sobre a nosa cidade noutros ámbitos políticos, sociais ou xeográficos non democráticos. E é por iso que avanzamos, desenvolvemos e presentamos un proxecto de cidade, onde ti decides, onde oito anos de FeC estamos convencidas que o mudarán todo cun programa participado por entidades, agrupacións e persoas a título individual, continuación coherente e necesaria do traballo desenvolto no anterior mandato.
Consulta o programa completo aquí