Descarga o programa completo aquí
Emprego
O emprego é unha parte vital para a recuperación social, demográfica e mesmo anímica da nosa cidade. Dende Ferrol en Común consideramos prioritario establecer políticas de emprego municipais que saiban dar resposta á crise estrutural da dependencia pública na creación de emprego, que cando goberna a dereita axita con amortizacións, desmantelamentos e volve raquíticos os sectores públicos. Nos últimos anos Navantia, CHUF e Arsenal son os principais empregadores da comarca. Pero paralelamente, xurdiu un grupo de Pemes que traballan na diversificación, embrión en torno á Asociación de novos empresarios, que impulsan iniciativas TIC, que apostan pola innovación e que, xunto co impulso que está a dar o Campus de Ferrol a novas titulacións, como deseño de moda ou turismo, fannos manter viva a esperanza para non depender dos ciclos de construción naval
Malia a sensación colectiva, o ciclo 15-19 respecto ao 11-15 supuxo a baixada de 10 puntos porcentuais na taxa de desemprego e a creación de máis de 1000 postos de traballo. Ferrol en Común, a través dun dotado e con plena ocupación Centro de emprego municipal, foi un axente clave nesa recuperación, tanto con iniciativas propias coma cunha interlocución constante co tecido empresarial, sindical e social. Queremos seguir nese camiño, darlle solidez e continuidade, de xeito que de forma participada academos os nosos obxectivos: con emprego, benestar social e recuperación demográfica facer un Ferrol alegre e vivo, que recupere o pulso dun pasado non tan distante.
§ Pacto Local polo Emprego en coordinación cos diferentes axentes socias e mesas de traballo. Organización de mesas sectoriais polo emprego con representación de sindicatos, empresarios para detectar carencias formativas, así como necesidades de formación en novos perfís que se vaian demandar.
§ Apoio ao empredemento sostible e social, falamos de promoción da economía social, cooperativismo ou emprego verde. Creación da oficina do cooperativismo. Aposta pola formación en economía social.
§ Política impositiva de apoio ao inicio da actividade económica, é dicir aprazar e diferir os impostos e gastos municipais para empresas de nova creación ou instalación no concello sempre que cumpran os requisitos de xerar empregos de calidade.
§ Liñas de apoio económicas e formación para ás PEMES e o pequeno comercio, para a busca da diversificación da súa actividade e aumento do valor engadidos dos produtos.
§ Na contratación pública municipal, inclusión nos pregos administrativos das cláusulas sociais (especialmente en relación ao xénero e ás condicións laborais e cunha política activa de RSC, responsabilidade social corporativa).
§ Investir na formación propia adaptada á realidade social. Seguir traballando na homologación das aulas para poder impartir formación propia: medio ambiente, agricultura ecolóxica, creación de empresas, prevención de riscos laborais, novas tecnoloxías e TIC´s.
§ Ofrecer chan industrial para o asentamento de empresas de novas tecnoloxías, do terceiro sector ou emprego sostible
§ Participación en programas de emprego en colaboración e cooperación con outras administracións, para desenvolver proxecto de desenvolvemento local e recuperación do patrimonio, como o dique da Cabana ou Museo da Sociedade Galega de Historia Natural.
§ Aposta pola construción naval e o estaleiro 4.0 en colaboración coa Universidade da Coruña (UDC).
Mocidade
A nosa mocidade vémola cada día nas rúas e prazas, cada vez máis participativa nas mobilizacións sociais, cada vez máis consciente da forza do colectivo, logo da crise de individualismo extremo que vivimos nos primeiros anos do século XXI.
Non se pode negar que o problema principal e máis acuciante, xa estrutural, de Ferrol, é a perda de poboación, indubidablemente vinculada á falta de emprego pola crise industrial reiterada dende que outras instancias quixeron converter á nosa cidade nunha cidade de servizos, unha construción inventada contra natura que agora toca reverter. E ese é o papel da mocidade, valente e loitadora, que participa na folga feminista, na folga de estudantes, que se agrupa en entidades asociativas e practica deportes urbanos. Pero é obvio que a mocidade por si mesma non poderá sobrevivir ao bombardeo de destrución de emprego e desmantelamento dos sectores produtivos que estamos a vivir. Precisamos de institucións
fortes e decididas que ofrezan camiños de formación e lecer aos nosos mozos e mozas, para reter todo o seu talento dentro das nosas fronteiras e poder construír un Ferrol mellor. Así, dende esta concellaría, recuperouse a Casa da mocidade, organizáronse actividades en Esteiro, Santa Mariña, Praza de España… de deportes urbanos e creación, organizáronse múltiples xornadas e cursos formativos, e ese debe ser o camiño a seguir, poñer a disposición os vehículos necesarios para que os nosos mozos e mozas transiten con facilidade polo camiño de amosar unha faciana de Ferrol máis positiva, alegre e humana. Ferrol en Común confía na mocidade para cambiar a orde do preestablecido e acompañalos nesa senda de transformación.
§ Casa da mocidade autoxestionada, coma durante este mandato, blindada a actividades para mozas e mozos.
§ Plan de emprego específico destinado á mocidade 19-23. Programa de apoio ás cooperativas integradas por xente moza.
§ Tarxeta +nova de acceso bonificado a centros deportivos e actividades culturais.
§ Promover a cesión dunha cota de vivendas en réxime de aluguer de titularidade municipal.
§ Promover o asociacionismo xuvenil. Creación dunha asesoría integral para a mocidade e adolescencia, que proporcione información e recursos, que a dinamice e a poña en valor, para erradicar o bullying, o consumo de drogas e fomente a alimentación saudable, o voluntariado, os programas de educación sexual, o coidado do entorno.
§ Creación de espazos de lecer permanentes, tanto na zona rural como urbana, con roteiros e deportes urbanos, que fagan do coñecemento e a saúde piares básicos nas súas opcións de desenvolvemento.