Descarga o programa completo aquí
Participación e Transparencia
Nos últimos catro anos Ferrol subiu exponencialmente en transparencia. Entramos no goberno prometendo abrir portas e xanelas e acadámolo. Non só no plano formal, cunha contención de gasto protocolario e suntuario, restrición no uso de vehículos oficiais e baixada de salarios, se non tamén de forma obxectiva, chegando, algo impensable hai poucos anos, a ser a terceira cidade de Galicia con maior transparencia.
O cambio da páxina web, con acceso a todos os contratos públicos, declaracións de bens e rendas de toda a corporación, actas de comisións e plenos, fixeron de Ferrol un concello con paredes de cristal.
A chegada da xente do común ás institucións supuxo un intrusismo na vella política, esa que fai do servizo á veciñanza unha profesión, e que dirixen as súas accións políticas dende altas esferas que nada teñen que ver cos poderes democraticamente escollidos. Nós estivemos para a xente e coa xente, accesibles, con proximidade e humildade, recollendo todas as propostas individuais e colectivas, tratando de dar cumprimento ao mandato popular, sen ataduras nin dependencias externas.
No seguinte mandato o obxectivo é ampliar horizontes, pero cómpre mudar o modelo actual, facer da nosa cidade un espazo participado onde se involucren máis os mozos e mozas, onde a política non xere desidia se non ilusión, e para iso propoñemos novos mecanismos e modelos.
§ Facilitar o acceso da cidadanía aos servizos e recursos creando unha comisión técnica de redución drástica da burocratización extrema e discrecionalidade na aplicación dos procedementos administrativos, que asegure a coherencia, homoxeneización e seguridade xurídica na interpretación da normativa vixente, con incremento de persoal público e procesos áxiles de resposta inmediata.
§ Aprobar un novo regulamento de participación cidadá, menos ríxido, que permita un desenvolvemento realista duns orzamentos participativos e o seu desenvolvemento progresivo nas asembleas de barrio e participación a través das novas tecnoloxías, eixo da participación veciñal, visualización final do traballo realizado e o que se fixo con eses orzamentos.
§ Fornecer aos medios de comunicación do concello para dar a coñecer á cidadanía o labor municipal.
§ Promover a información e participación por medio da web e redes sociais municipais. Fortalecer o tecido asociativo dando ás entidades protagonismo, información e participación. Facilitar a participación cidadá na vida do concello: dar voz en plenos e comisións e os contactos coa administración, nomeadamente das distintas concellarías.
§ Axilizar a resposta aos requirimentos e solicitudes feitos pola cidadanía, nomeadamente dende o rexistro municipal. Axilizar e formalizar os sistemas de participación en concursos de subvencións municipais.
§ Abrir procesos democráticos alentando a unha maior participación activa das mulleres e colectivos con especial vulnerabilidade, a partir de redes de apoio mutuo.
§ Impulsar o voluntariado e a participación social, especialmente cun programa específico contra a soidade das persoas maiores e outros colectivos que favoreza o acompañamento e a convivencia interxeracional.
§ Xestionar as convocatorias ou convenios co compromiso de publicación e resolución no primeiro semestre do ano, coa difusión inmediata dos proxectos subvencionados tras a súa resolución.