Ferrol, 20 de maio de 2022
Onte tivo lugar a Asemblea Cultural convocada por Ferrol en Común co obxectivo de escoitar e recoller as inquedanzas e propostas de todo o tecido cultural e a verdade, estamos moi agradecidos coa alta participación que tivo. Persoas a título particular, de diferentes entidades, asociacións veciñais e axentes do mundo da cultura pertencentes a todos os ámbitos, acudiron a este espazo de comunicación onde expuxemos o que buscábamos ao convocar esta xuntanza e escoitamos o que o resto tiña que dicir.
Esta Asemblea Cultura definímola coma un punto de partida nun longo camiño cuxo final sería poñer á cultura ferrolá no lugar no que debe estar, impulsándoa e potenciándoa sobre todo a través do tecido local, coma viñemos facendo durante o noso mandato, cos nosos acertos e nosos erros, pero sempre escoitando.
FeC sempre puxo en primeira fila á cultura, pois considerámola unha ferramenta de cambio social e de crecemento tanto persoal coma colectivo. Por eso motivo, escoitar aos verdadeiros protagonistas da cultura da cidade fainos coñecer de cerca os problemas que están a xurdir, as barreiras coas que se atopan e as iniciativas que non están a ser canalizadas.
Todo o falado na Asemblea de onte enriquece enormemente os nosos idearios políticos e o noso traballo. Dende a oposición seguiremos poñendo a cultura coma un valor irrenunciable a calquera pacto ou acordo e de cara a unhas novas eleccións, será unha das nosas aspiracións volver a traballar a área de cultura dende o goberno.
