Ferrol, 3 de maio de 2022
No pasado mes de marzo coñecíamos a sentenza do TSXG na que se confirmaba a condena de prisión de seis meses e 1 día ao sindicalista Xesús Anxo López Pintos por atentado contra un axente da autoridade, durante unha protesta ante o Hotel Almirante onde o PP celebraba un acto electoral.
Ferrol en Común reitera o seu apoio ao ex secretario comarcal da CIG en Ferrol, López Pintos, que simplemente exercía o seu dereito de defensa da clase traballadora. Esta sentenza tan só pon de manifesto a represión e criminalización do sindicalismo e das mobilizacións sociais, cuxo único propósito é a defensa dos dereitos dos traballadores e traballadoras e a mellora da súa vida.
Ferrol en Común rexeita este proceso, esta sentenza e esta condena. López Pintos converteuse nunha vítima da Lei Mordaza, que aínda hoxe en día segue vixente e supón unha materia pendente para o actual goberno.
Xunto co tecido sindical da nosa comarca, o cal celebramos a súa unidade en momentos tan importantes coma este, sumámonos á campaña, á manifestación que terá lugar o vindeiro 30 de maio e a todas as accións relativas a apoiar a Xesús Anxo López Pintos, vítima da represión por defender os dereitos de toda a clase traballadora.
Así mesmo, facemos un chamamento a todas as forzas políticas da cidade e do concello para que se sumen e amosen o seu apoio ao sindicalista nesta inxusta e exaxerada condena.
